Kompanya Internasional Greac Over hosi Cina hamutuk ho kompanya sira seluk nebe hala’o hela projetu iha Viqueque vila sei ajuda ateru ka normaliza Estrada hosi Baze Camp Betise mai to’o iha Kugato’I iha tempu badak ne’e. lia ne’e hato’o hosi Dir. Servisu Obras Publiku Municipio Viqueque Grasindo Gomes ba jornalista foin lalais ne’e iha nia servisu fatin Beloi Viqueque.
“ Ida ne’e ita halo ona kontactu ho kompanya Cina nian ne’e no mos kompanya sira seluk nebe maka iha Viqueque atu ateru tiha kuak sira nebe iha vila laran liu liu iha parte Betise nian no posibilidade sei mai to’o iha Lugato’I, no ida ne’e inisiativa hosi Obras Publiku Municipiu nian hamutuk ho Prezidente Autoridade Municipiu (PAM) hamutuk maka husu ajuda ba Kompanya atu bele ajuda normaliza tiha Estrada ne’e tamba ejijensia hosi ita nia komunidade sira atu oinsa bele halo kaber tiha Estrada refere. Tuir lolos kompanya sira komesa ona ateru maibe tamba udan nebe halo be nalihun iha Estrada sira ne’e maka ami husu atu hein lai uituan to’o udan para no be sira ne’e menus tiha maka bele ateru atu nune’e bele metin”.
Entretantu hatan ba perguntas jornalista nian kona ba oinsa atu halo konstrusaun foun ka halo diak liu tan Estrada iha area Cidade Viqueque nian Dir MOP Municipio ne’e dehan, “ ne’e kompetensi Nasional nian, Ministru maka bele deside. Maibe dadus sira ita haruka hotu on aba iha Ministeriu kona ba parte Estrada urbana iha cidade Viqueque hamutuk kilometru hat liu no ita hein deit. La kleur tan Vise Ministru sei mai halo vizita ida hodi hare asuntu sira ne’e “.
Wainhira jornalista husu kona ba kondisaun Estrada hosi Viqueque ba Beaco liu ba Watulari no Watu Carbau iha atrea Naeboruk nian nebe ameasadu atu kotu Gracindo Gomes esplika katak, “ ida ne’e parte tekniku sir aba halo ona levantamentu no komesa prepara hela relatoriu hodi haruka ba Nasional, maibe kuandu iha situasaun nebe grave no emerjensia ami sempre lalais hatu kontaktu ho Instituto de Gestaun Ekipamentus (IGE) hodi haruka ekipamentus sira mai halo normalizasaun “.
Kona ba preokupasaun hosi parte ajente pesoal saude sira nian nebe preokupa ho setrada ba suco Waimori (Waimori Tula nebe defikuta tebes sira wainhira pasiente ruma moras todan iha neba maibe sira labele ba lalais tamba kondisaun Estrada nebe la diak, Dir MOP ne’e dehan, “ ida ne’e ita hotu hotu nia preokupasaun, tantu autoridade Municipal sira nian nune’e mos Nasional nia preokupasaun hotu. Foin loron ida liu ba Vice MOP ba to’o ona iha neba hodi hare rasik, hein katak sei iha planu nebe diak hodi solusiona “.
Entretantu tuir observasaun jornalista RPV sira nian nota katak kondisaun Estrada urbana iha capital Municipio Viqueque nian maioria at grave, liu liu komesa hosi Sentru Saude Viqueque ba to’o iha Baze Camp Betise defikuta tebes ema hotu wainhira tempu udan, nune’e mos Estrada sira nebe liga ba Postos Administrativos sira maioria kondisaun at hotu no defikuta komunidade sira nebe hakarak atu lori sira nia produtu local mai fa’an iha merkadu iha Viqueque.
Jornalista ; Adriano A. Mesquita
