Komunikadu Imprensa, Sorumutu Konsellu Ministrus nian iha loron 12 fulan-fevereiru tinan 2025

Konsellu Ministrus hala’o sorumutu iha Palásiu Governu Dili no aprova projetu Proposta Lei kona-ba Kódigu Propriedade Industriál, ne’ebé aprezenta hosi Ministru Komérsiu no Indústria, Filipus Nino Pereira.

Projetu proposta Lei ida-ne’e hetan ona aprovasaun hosi Konsellu Ministrus iha sorumutu loron 20 fulan-marsu tinan 2024 nian no haruka ona ba Parlamentu Nasionál. Maibé, durante prosesu lejizlativu, identifika ona nesesidade atu halo revizaun, nune’e diploma ne’e limitadu ba aspetu mínimu sira ne’ebé ezije hosi kompromisu internasionál sira, ne’ebé lori ba elaborasaun proposta foun ida.

Kriasaun Kódigu Propriedade Industriál hanesan rekizitu ida iha ámbitu adezaun Timor-Leste ba Organizasaun Mundiál Komérsiu (OMK) no integrasaun ba ASEAN. Prosesu sira-ne’e ezije kumprimentu ba Akordu OMK nian kona-ba Aspetus Direitus Propriedade Intelektuál Relasionadus ho Komérsiu (TRIPS) no armonizasaun ho dispozisaun sira hosi konvensaun internasionál sira ne’ebé regula hosi Organizasaun Mundiál ba Propriedade Intelektuál.

***

Hafoin aprezentasaun kona-ba rezultadu husi projetu sira setór eletrisidade nian ne’ebé dezenvolve ona husi fulan-juñu tinan 2023 to’o fulan-dezembru 2024, nune’e mós planu orsamentál ba tinan 2025 Eletrisidade Timor-Leste, EP (EDTL, EP) nian,  Konsellu Ministrus, ho proposta hosi Ministru Obras Públikas, Samuel Marçal, delibera hodi autoriza realizasaun despeza ba kontratu subvensaun ba transferénsia provizaun hosi Orsamentu Jerál Estadu (OJE), iha Programa Ministériu Obras Públikas “802 Eletrisidade” ba EDTL, EP, ho valór totál dolar amerikanu millaun 166,5.

Montante ida-ne’e ho objetivu atu garante rekursus nesesárius ba EDTL, EP, entidade ida ne’ebé superviziona husi Ministériu Obras Públikas, hodi garante fornesimentu enerjia elétrika iha territóriu nasionál tomak, servisu públiku ida ne’ebé esensiál ba populasaun no ekonomia país nian.

***

Ministru Prezidénsia Konsellu Ministrus, Agio Pereira, halo aprezentasaun informativa ida kona-ba prosesu fiskalizasaun abstrata susesiva inkonstitusionalidade nian ne’ebé rekere ba Tribunál Rekursu husi Provedoria Direitus Umanus no Justisa (PDHJ). REMATAhttps://timor-leste.gov.tl/?p=41868&lang=tp