Kordenador escolar ensinu Baziku Filial Uma Ki’ik Beobe Antonio Pinto husu ba EJP Centru Cabira Oan atu hapara tiha kontratu ho kompanya nebe maka sosa fos hodi oferese ba merenda escolar sira iha Viqueque vila nia laran tamba fos nebe sira sosa ne’e ho marka TUM_TUM ladiak no metan ka dodok hotu kedas.
“ Hau nudar koenador ba escolar ida ne’e (EBF Beobe Uma Ki’ik) hau nia rekomendasaun maka ida ne’e, tamba fos nebe ita hetan ona no hare rasik ho matan katak fos ne’e metan hotu kedas no at ona entaun diak liu ita hapara ho kontratu ne’e no buka fali kompanya seluk hodi halo kontratu foun, ou selae entaun fo direitamente ba fornesedor hahan ba alunus sira maka sira rasik mak jere “.
Entretantu hatan ba pergunta jornalista nian kona ba karik situasaun fos at hanesan ne’e akontese ona iha tempu pasadu ka seidauk Antonio Pinto klarifika
“ Uluk akontese ona maibe ida ne’e tamba fatin fornesedor sira nian maka ladun seguru, hodi halo udan ben tama tamba ne’e maka sira hadiak tiha fatin halo diak ona mais no fim hadiak tiha fatin entaun iha segunda liu ba sira lori fos mai hatun e tersa fornesedor sira loke para atu te’in hare ba fos ne’e metan hotu kedas, entaun hau nudar kordenador ba hare hodi hasai tiha foto no manda ba sira parte ekipa alimentar nian no sira hamutuk ho PAM Viqueque mai diretamente hodi hare kedas “.
Iha fatin hanesan fornesedora hahan ba escolar Uma Ki’ik Beobe Adelina Pereira rekomenda atu kompanya fornesedor fos ba merenda escolar sira atu prepara ka sosa fos nebe diak atu nune’e sira nebe te’in hodi fornese ba labarik sira han ho diak.
“ Ami nudar fornesedor ba escolar Uma Ki’ik hakarak rekomenda hanesan ne’e, ami hakarak atu saida de’it maka Estadu prepara hanesan fos sira prepara mai ami hakarak buat ne’e diak atu nune’e ami nia oan sira han ba diak, bele hetan saude nebe diak labele hetan fali moras, tamba oan atu se nia oan de’it maka mai iha escolar ida ne’e hanesan ami nia oan hotu, tamba ami nebe maka fornese hahan hahan ba sira hanesan mos sai inan ba sira iha escolar ida ne’e. Atu han diak ka la diak ne ami mak kaer ba hodi fornese ba sira, I ami hakarak ne’e labarik sira tenki han hahan diak hodi nune’e bele iha saude nebe diak ba sira “.
Adelina mos hatutan dehan se diak liu ne’e osan ba sosa fos nian mos entrega hotu deit ba sira maka jere hamutuk ho osan modo nian tamba esperiensia hatudu ona katak iha pasadu sira mak kaer hotu osan no la akontese situasaun hanesan ne’e, maibe hafoin entrega ka fo fali tender ba kompanya maka sai hanesan ne’e. no nia mos sublinya katak akontesementu hanesan ne’e ba dala rua ona iha tinan 2024 mos akontese.
“ Uluk ami mak kaer ne’e buat hotu la’o ho diak no la akontese buat ida maibe entrega fali tiha ba iha kompanya maka akontese kedas. Iha tina kotuk mos hanesan ne’e, sira lori fos mai at hotu kedas, entaun sira mai foti tiha hodi troka fali ho fos diak, laiha buat ida I agora mos hanesan nafatin, fos nebe sira lori mai ne’e at hotu kedas. Tamba ne’e maka ami rekomenda atu bele karik osan ba fos nian mos entrega mai ami mak jere hotu atu nune’e ami bele hare fos nebe diak no nebe mak at “.
Wainhira jornalista halo konfirmasaun ho ekipa EJP 02 Centru Cabira Oan Apolinario Vicente Soares rekonyese katak fos at duni no sira pronto atu simu kritika hosi parte sera relevante no sei kontinua oferese fos ba merenda escolar iha Viqueque vila nia laran
“ Hosi autoridade sira karik dehan atu hapara ami tuir deit no ami hosi ekipa EJP pronto atu hatan wainhira iha investigasaun karik akontese, maibe ba agora dadauk ne’e ami sei pronto nafatin atu oferese fali fos nebe diak hodi troka atu nune’e programa merenda escolar iha Viqueque vila nia laran kontinua no labele para “.
Entretantu akontesementu ne’e iha loron 2 fulan Abril ne’e no halo Prezidente Autoridade Municipiu (PAM) Viqueque Francisco Cruz Simoẽs Gonzaga Soares to’o kedas iha escolar Filial Beobe hodi observa direitamente no husu kedas ba parte PNTL hodi prende kedas fos nebe ho kondisaun at ne’e no orienta kedas ba EJP troka kedas ho fos nebe diak ( fos Manu Vitoria).
Jornalista ; Adriano A. Mesquita
