Be Timor Leste Empreza Publiku ( BTL-EP komesa hosi fulan Janeiro mai to’o iha Desembro tinan 2024 ne’e hatama ona reseitas ba kofre Estadu hamutuk osan Rihun rua nulu resin ida atus sia sia nulu resin ida pontu sentavus ruanulu ( $ 21.991,20 ). Lia ne’e hato’o hosi Kordenador BTL-EP Municipiu Viqueque Marito da Costa ba jornalista Radio Povo Viqueque (RPV) foin lalais ne’e iha nia servisu fatin Beloi Viqueque. Entretantu Kordenador BTL ne’e mos konfirma liu tan katak reseitas nebe hetan mai hosi konsumidor sira nebe maka parte BTL instala ona metro kontador ba iha sira nia uma, hamutuk atus nen hat nulu (640) resin.
“ Hahu hosi Janeiro to’o ohin 17 de Desembro tinan 2024 ne’e, ita hatama ona osan ba kofre Estadu hamutuk $ 21.991,20. Reseita sira ne’e ita hetan hosi ita nia kliente sira nebe ita instala ona metro kontador liu liu iha Viqueque Vila hamutuk 646 kontadores. Ida ne’e maka ita hetan durante ne’e ”.
Marito mos hatutan dehan, alvu BTL nian iha Viqueque vila rasik sei instala metro kontador hamutuk 1994 maibe to’o agora foin maka halo instalasaun ba uma kain 646 no sei falta 1300 resin. Nia sublinya dehan instalasaun la’o kleur tamba iha kanu balun nebe presija hadiak no troka fali ho kanu founn, tamba ne’e maka defikuta prosesu instalasaun metro kontador.
Kordenador BTL – EP Municipiu Viqueque Marito da Costa mos akresenta katak dejafius nebe sira hasoru maka seidauk iha kolaborasaun diak entre konsumidor ho BTL rasik, koneksaun illegal sira no mehi nebe Viqueque iha atu halo melloramentu ba iha Municipiu la konsege implementa.
“ Dezafiu nebe maka BTL Viqueque hasoru maka, primeiru, koperasaun kliente sira nian menus tebes, segundu maka koneksau illegal sira nebe maka ita nia komunidade sira laiha konsiensia atu bele oferese be ba nia maluk sira, maibe sira uja be tuir sira nia gostu, ida ne’e maka ami hasoru no ami sosialija bei beik atu bele ultrapasa ida ne’e, no terseiru maka mehi bot nebe Viqueque iha katak atu halo melloramentu ba iha be capital Municipiu nebe ita halo kedas estudu komesa hosi tinan 2015 mai to’o ohin loron maibe la konsege implementa tamba hetan hela pending hosi ita nia Ni’I Ulun sira. Ida ne’e mak fo impaktu ba ita wainhira iha tempu bailoron Ita iha Viqueque ne’e menus tebes be “.
Entretantu Marito da Costa mos kontinua dehan, iha tinan 2024 ne’e BTL konsege hasai makina sanyu nebe maka komunidade uja hodi dada be iligal ba sira nia uma hamutuk 57, no BTL kontinua instala kedas metro kontador ba iha sira nia uma. Nune’e mos Marito da Costa konfirma katak ba tinan 2025 BTL – EP Municipiu Viqueque sei halo esforsu maka’as hodi mellora sistema be iha capital Municipiu no kontinua halo instalasaun metro kontador ba komunidade sira nebe seidauk instala, nune’e mos komesa ona halo instalasaun ba Postu Administrativu rua nebe maka prosesu konstrusaun ka instalasaun be mos la’o hela no sei remata iha tempu badak, atu nune’e Postu 2 ne’e mos bele kontribui ona reseitas ba Estadu. Nune’e mos kontinua tau matan ba projetu instalasaun be mos nian iha Posto Watu-Carbau nebe maka foin komesa.
Jornalista ; Adriano A. Mesquita
1CgAL9w2s9e