Primeiru-Ministru, Kay Rala Xanana Gusmão, marka prezensa iha loron 20 fulan-outubru tinan 2024,iha serimónia tomada pose Prezidente Repúblika Indonézia nian, Prabowo Subianto, no Vise-Prezidente, Gibran Rakabuming Raka, ba mandatu tinan 2024-2029. Serimónia ne’e, hala’o iha Salaun Nusantara-Parlamentu, iha Jakarta, hetan partisipasaun hosi líder mundiál oin-oin
Iha ninia diskursu tomada pose, Prezidente Indonézia ba dala ualu subliña ninia kompromisu atu hametin relasaun di’ak ho nasaun hotu-hotu, liuliu ho ninia viziñu sira. “Kuandu ko’alia kona-ba asuntu internasionál, Indonézia hili ona dalan livre, ita lakohi tuir paktu militár ruma, tanba ne’e ita hakarak hili dalan amizade ho nasaun hotu,” dehan Prabowo Subianto.
Primeiru-Ministru Xanana Gusmão hatudu nia satisfasaun hodi partisipa iha momentu ne’e hamutuk ho reprezentante sira hosi nasaun oin-oin, hodi destaka pontu esensiál ida hosi diskursu Prabowo nian: “Nu’udar Prezidente, nia labele haree de’it ba nia-an, família ka grupu, maibé serbí povu.” Xanana hatutan: “Ida-ne’e hanoin ida ne’ebé ha’u sempre defende mós
Primeiru-Ministru destaka mós katak Prabowo rekoñese dezafiu importante sira hanesan seguransa ai-han, abitasaun no empregu, kompromete hamutuk esforsu sira hodi hadi’a kondisaun moris iha Indonézia. “Nia ko’alia kona-ba problema ne’ebé Indonézia hasoru, la’ós de’it kona-ba ai-han, maibé mós falta uma no kampu servisu. Kona-ba relasaun internasionál, Prabowo afirma katak ‘Indonézia tomak apoia Estadu Palestina’, pozisaun ida ne’ebé ita mós fahe,” dehan Xanana
“Prezidente nia diskursu ne’e, liu-liu, hanesan mensajen ida atu sosiedade moris iha dame nia laran, laiha divizaun, hodi permite ema hotu kontribui ba dezenvolvimentu nasaun nian”, akresenta Primeiru-Ministru Xanana Gusmão.
Xanana mós temi katak Prabowo hato’o ona nia intensaun atu vizita Timor-Leste, no sei halo preparasaun ba vizita ne’e. Primeiru-Ministru reforsa tan katak polítika esterna Governu Konstitusionál IX bazeia ba independénsia no soberania: “Ba Timor-Leste, laiha aliadu ka inimigu, hotu-hotu mesak belun de’it. Iha situasaun internasionál ne’ebé kompleksu daudaun, ida-ne’e sei kontinua sai prinsípiu ne’ebé orienta Timor-Leste iha ninia relasaun esterna sira
Hafoin serimónia, Primeiru-Ministru Xanana Gusmão, akompaña husi Ministru Negósiu Estranjeiru no Kooperasaun, Bendito dos Santos Freitas, no embaixadór Timor-Leste iha Indonézia, Roberto Sarmento de Oliveira Soares, partisipa iha jantar ne’ebé organiza husi Prezidente Prabowo no Vise-Prezidente Gibran Rakabuming Raka, iha Palásiu Prezidensiál, ne’ebé hetan partisipasaun husi reprezentante husi nasaun oin-oin.
Molok vizita ba Indonézia, Primeiru-Ministru Xanana Gusmão partisipa iha Simeira ASEAN ba dala 44 no 45 iha Vientiane, Laos, hosi loron 9 to’o 11 fulan-outubru. Entre loron 12 to’o 18 fulan-Outubru, Xanana Gusmão vizita Portugal, iha ne’ebé nia sai sasin ba asinatura hosi Programa Estratéjiku Koperasaun nian ba tinan 2024-2028 no hala’o enkontru sira ho líder polítiku portugés sira. https://timor-leste.gov.tl/?p=40403&lang=tp&n=1
