Sekretariu Ezekutivu Konselhu Veteranus no Kombatentes da Libertasaun Nasional Municipiu Viqueque, Daniel Sarmento – “FOGETE”, husu ba maluk veteranus sira hotu iha Municipiu Viqueque atu labele halo impedementu ba programa Governu nian atu halo dezenvolvementu iha Municipiu ida ne’e. Fogete mos reforsa dehan dala barak veteranus sira maka impede dezenvolvementu hodi buka hadau malu ba projetu projetu.
“ Nudar Veteranu, Veteranu iha Viqueque pronto nudar parseiru Governu nian atu saida deit ami Veteranus pronto atu kopera ho Governu hodi hala’o dejenvolmentu Nasional iha rai ida ne’e, nebe nudar Veteranu iha Konselhu Viqueque nian husu mos, apela mos ba Veteranus hotu hotu iha Municipiu Viqueque ida ne’e atu labele trava dezenvolvementu iha Viqueque ne’e. Ne’e la diak, tamba dala barak ita Veteranus ne’e maka ba hadau malu fali projetu, ne’e la diak. Nudar Veteranus ita iha pensaun fulan fulan, tamba nudar Veteranu ita maka atu apoia Governu atu hala’o dezenvolvementu iha rai ida ne’e “.
Entretantu Fogete hato’o lia ne’e wainhira partisipa iha workshop ida nebe organiza hosi Ministeriu Interio (MI) nebe realiza iha salaun Administrasaun Municipal de Viqueque foin lalais ne’e. Daniel Sarmento –“Fogete” mos klarifika tan dehan
“ Hanesan Veteranu pronto atu kopera ho parte relevantes sira hodi kria seguransa no estabilidade iha Municipiu Viqueque. No nudar sidadaun ba rai ida ne’e ita hotu nia responsabilidade, ita hotu tenki haka’as an atu rai ne’e bele hakmatek no seguransa ne’e bele la’o diak atu nune’e ita hotu bele simu dezenvolvementu iha ita nia Municipiu “.
Ekipa kobertura RPV
