Agensia Internasional ADRA hala’o sosializasaun regulamentu ka lei kona ba oinsa atu utiliza rai no nia riku soin sir aba komunidade Suku Dilor Postu Administrativu Lacluta foin lalais ne’e. Edmundo de Sousa Gama hanesan ajente fasilitator Ajensia ADRA nian dehan, sira nia prejensa atu ajuda fasilita ba komunidade sira oinsa atu utilija rai no rekursu sira iha suku laran, no esbosu lei ka regulamentu sira ne’e rasik la’os ADRA maka prepara maibe hosi komunidade Suku Dilor maka prepara no sira ajuda esplika de’it kona ba nia konteudu sira.
“ Ita nia actividade ohin mai iha ne’e atu sosializa kona ba regulamentu Suku oinsa atu utiliza rai no mos rekursu sira nebe maka iha suku laran, nebe ohin ita komesa hosi aldeia Boruk no aban ita sei kontinua ba suku seluk no semana oin ita sei kontinua to’o aldeia 4 nebe iha suku Dilor nia laran ne’e remata. No esbosu lei nebe iha la’os hosi ADRA maka prepara maibe hosi membru Konselhu sira suku Dilor nian maka prepara no ADRA so mai atu fasilita deit teknikamente atu oinsa atu actividade sira ne’e atu la’o “.
Entretantu Edmundo de Sousa Gama mos afirma tan katak actividade refere importante tebes ba komunidade sira, liu liu komunidade suku Dilor tamba liu hosi sosialijasaun lei ne’e bele reduz ona ema nebe maka gosta estraga ema seluk nia sasan inklui minimija sunu rai ka tesi ai arbiru.
“ Programa ne’e importante ba komunidade sira tamba liu hosi sosializasaun lei ida ne’e atu oinsa bele kesi komunidade sira atu oinsa bele respeita malu, liu liu oinsa atu utiliza rai no mos bele kesi komunidade sira utiliza rai no mos rekursu sira nebe maka iha laran. It abele dehan katak ho ida ne’e bele reduz on aka deminiui ona ema sira nebe maka gosta estraga ka foti ema seluk nia sasan no seluk tan maka it abele reduz ona oinsa atu komunidade sira labele sunu rai arbiru, tesi ai arbiru no ida seluk tan maka it abele hanorin ona komunidade sira atu labele muda to’os ba mai, atu nune’e aihoris sira nebe maka sira kuda bele garantia katak bele fo benefisiu ba komunidade sira rasik “.
Entretantu Alarico Pinto Amaral hanesan Cefe Aldei Povoasaun Boruk sente kontente ho programa nebe maka ADRA lori mai implemanta iha sira nia suku no aldeia.
“ Hau sente kontente tebes tamba ADRA lori nia programa ida ne’e la’os nia nia hanoin mesak maibe hamutuk ho ami aldeia ida ne’e atu nune’e bele hadia no proteze ami nia rai ida ne’e ba future, tamba ne’e ami hosi bairu ida ne’e aldeia ida ne’e kopera tebes atu nune’e bele realiza iha ami nia aldeia no mos ba to’o iha suku sira hodi nune’e bele proteje ami nia rai no nia riku sir aba iha future nian “.
Nune’e mos Cefe Aldeia Rade Uman Apolinario Soares Pinto mos deklara katak;
“ Programa ida ne’e hala’o hosi ami membru konselhu suku sira maka ADRA mai ajuda de’it, nebe bainhira ba to’o iha ami nia aldeia karik ami sente kontente no simu ho diak tamba nia benefisiu baa mi rasik “.
Entretantu Ciquito Lopes nebe hanesan lia na’in aldeia Boruk nian deklara katak;
“ Primeiru ami hakarak agradese ba ADRA ho Konselhu do Suku tamba bele mai ona halo sosializasaun lei kona ba rai no nia rekursu sira, hau nudar komunidade iha benefisiu maibe presija debate diak liu tan tamba iha buat balun nebe maka la kondis ho komunidade sira nia moris lor loron nian, ida ne’e maka presija hakle’an liu tan par abele sai lei ida nebe maka bele kesi hotu ami komunidade sira iha suku Dilor no mos ba suku seluk. No nia benefisiu baa mi komunidade maka kuandu animal hotu kesi entaun ami bele halo to’os ho livre, la presija tan ona atu halo lutu ami nia ekonomia bele moris. Tamba animal sira kesi hotu se lae maske ami halo to’os mos animal sir aba estraga hotu no ami labele halo buat ida. No benefisiu ida bot liu maka, ema balun nebe maka sasan laiha maibe nia ba foti (Na’ok) ema seluk nia sasan hodi halo nia sasan iha. Ne’e akontese barak ona iha ami Posto Lacluta liu liu ami aldeia Boruk rasik “.
Entretantu actividade sosializasaun regulamentu ka lei ne’e rasik hala’o hosi Ajensia Internasional ADRA hamutuk ho membru konselhu Suku Dilor nian iha Sesta Feira loron 19 -07-2024 ne’e no komesa hosi aldeia Boruk no sei kontinua ba aldeia 3 seluk hanesan aldeia Rade Uman, Aldeia Tula Oli no Aldeia Aidak Laran molok implementa. No tuir observasaun jornalista RPV nian iha terenu nota katak actividade refere hetan partisipasaun maximu hosi komunidade sira inklui lideransa aldeia no suku Dilor nian.
Jornalista ; Adriano A. Mesquita.
