Governo hamutuk ho Timor gap lansa publikasaun dadus no propriadades area designado ba projetu planta LNG iha Beaco Posto Viqueque Vila Kinta feira semana liu ba, nebe loke direitamente hosi Ministro Petrolio no Rekursus Minerais Victor Soares. Iha nia deskursu Ministru dehan prosesu nee ita hahu ho kompromisu ida. No hahu iha tinan 2020 ita hahu fila fali no ita hotu iha konkordansia atu lori fali projetu nee mai iha Beaco. No prosesu hotu ita liu ona ohin ita mai fali iha nee atu oinsa ita atu ezekuta no halo ajustamente atu halo dialogu ho komunidade sira nebe afetadu.
Ministru Petroliu no Rekursu Minerais Victor da Conceicao Soares mos hatutan dehan Komunidade Beaco iha duni sira nia valores patriotismo no Nasionalismu tamba ho voluntariu hakarak duni atu oferese rai nebe ho nia luan kuaze hertar atus lima ba estadu atu hari projetu nee. Tuir Ministru katak desizaun ida nee laos fasil maibe povo Beaco halo duni ida nee. Nee katak sira halo tuir duni ita nia erois sira nia luta uluk nian.
Iha fatin hanesan Representante Administrador Municipiu de Viqueque, Cosme Sarmentu husu ba komunidade Beaco no mos komunidade sira seluk nebe afetadu ba projetu ida nee atu kolabora hamutuk ho partes kompetente sira atu kontribui nafatin tamba karik projetu nee lao ona nia benifisiu ita iha Viqueque no liu liu Suco Maluru beaco maka sei sente maske projetu nee laos projetu Municipiu Viqueque nian maibe projetu Nasional.
Nunee mos Presidente Timor Gap agradese ba komunidade Beaco tamba bele kolabora hamutuk ho Tiomr Gap no Governu hodi aselera prosesu nee. Presidente Timor Gapa Antonio Jose de Sousa Loiola mos deklara katak ida nee laos final maibe nee hanesan marku ida importante hodi determina ita atu ba los iha nebe. No servisu sira nee tenki lao paraleu hotu no se buat hotu lao diak ita sei dada tempu nee badak no lais liu tan, maibe se bua hotu lao kleur entaun ita sei dada tempu nee naruk tan. Tamba nee nia husu ba parte hotu atu servisu hamutuk nafatin
Director Geral Terras e Propriadades nebe Representa Ministro da Justisa hodi marka mos presensa iha seremonia lansamentu nee hateten Ministeriu Justisa mos hola parte hotu iha actividade ida nee no prosesu nee lao kleur ona. No Ministeriu Justisa nia responsabilidade maka halo evantamentu ba rai iha area afetado, no rai nebe maka parte Terras e Propriadade halo levantamentu hamutuk liu haktares atus lima. No ohin ita publika ona dadus sira nee. DG nee mos hatutan dehan tuir lei praju ba publikasaun dadus nee sei lao durante loron sianulu ka fulan tolu la konta ho loron feriado sira hanesan sabadu no domingu. Tamba nee Director Geral Teras e propriadade nee huhu ba komunidade sira nebe sente afetadu atu ba hare lista nebe maka publika ka taka sai ona iha Sede Suco Maluru Beaco.
Maluk sira, hafoin de halao tiha lansamentu ba programa refere tuir kedas ho dialogu entre parte Governu, Timor Gap EP no komunidade afetado sira. No tuir observasaun jornalista RPV nian iha Suco Maluru Beaco nota katak hetan partisipasaun maximu hosi komunidade Suco Maluru nian no mos sira nebe laos hosi Suco Maluru maibe sira nia propriadade balun mos afetadu ba projetu LNG nee. Nunee mos fahe mos sertifikadu ba ekipa Taks force sira nebe durante nee servisu hamutuk hodi halo levantamentu dadus iha terenu.
Partisipa iha Actividade nee, Ministru Petroliu no Rekursu Minerais ho nia komitiva, Representante Ministru Justisa ho nia komitiva, Representante Administrador Municipiu de Viqueque ho Directores Linhas Ministeriais sira, Presidente Timor Gap EP ho nia ekipa, Presidente Konselho Konsultivu Fundu Petroliferu o nia ekipa no mos konvidadus sira seluk tan.
Jornalista : Adriano A. Mesquita
Editor : Florindo de Jesus
