Sesta feira semana liu ba,loron 20 fulan Junu 2025 hola fatin iha jardim 1959 Viqueque Prezidente Autoridade Municipiu (PAM) Viqueque Francisco Cruz Simoems Gonjaga Soares hamutuk ho autoridade local sira halo lansamentu ba ekipa konjunta ordenamentu Municipal Viqueque nian nebe sei hala’o servisu tuir tarefa ida-idak nian. Ekipa ida maka sei hala’o sira nia servisu hodu kontrola animal sira nebe maka komunidade sira husik livre iha cidade Viqueque vila nia laran. Iha intervensaun PAM Francisco dehan, tempu ona atu ita hanoin ba oin atu buat hotu tenki organijadu, buat hotu tenki la’o mos, tamba durante ne’e ita iha Viqueque ne’e deorganizadu liu.
“ Viqueque tempu ona atu hakat ba oin, tinan barak nia laran ema ho animal la’o soke malu hela deit iha dalan klaran, ita hotu la’o desorganizadu tan ne’e hau hanoin katak Viqueque tempu ona atu ita hakat ba oin, but hotu tenki organizadu, buat hotu tenki la’o ba oin. Se ita nafatin hanesan ne’e entaun ita lalika koalia dehan Viqueque pronto atu simu desentralizasaun poder lokal. Tan ne’e rekezitus ida maka ohin ita hahu halo lansamentu ne’e “.
PAM ne’e mos afirma tan dehan se ita la tau sasan sira ne’e tuir ida idak nia fatin, entaun lalika hanoin katak ita atu ba desentralizasaun, tamba atu ba iha neba rekezitus ida maka ohin ita halo dadauk lansamentu ne’e.
PAM Francisco mos konfirma liu tan dehan La kleur tan mos negosiantes sira nebe sei okupa espasu merkadu tuan Viqueque nian sei muda hotu ba Merkadu foun Olobai nebe oras ne’e dadauk sei iha hela prosesu rehabilitasaun.
“ Iha tempu badak mos ita nia vendedores sira mos sei mud aba iha merkadu Olobai wainhira nia rehabilitasaun remata ona, laiha ida maka desobedese laiha ida maka dehan la ba, Lei ita tenki tau iha leten as ba, primeiru Maromak, segudu maka lei para ita hour respeita hodi hakru’uk atu buat hotu la’o tuir nia dalan. Kona ba ohin ita halo lansamentu ne’e ho hanoin katak Viqueque tenki ba oin, Viqueque tenki mos saudavel no Viqueque tenki organizadu, para ita labele hatudu katak ita lakon ho Municipiu sira seluk . Tamba ne’e ita sei hahu ho kontrola animal sira nebe husik arbiru deit atu tenki sulan se lae tenki oho “.
Entretantu PAM Francisco mos kontinua apela ba sefe suku sira no mos ekipa informasaun nian atu kontinua fo avizu nafatin ba komunidade sira atu sulan animal sira iha luhan tuir sirkular nebe fo sai tiha ona iha tempu liu ba.
Entretantu iha fatin hanesan komandante PNTL Municipiu Viqueque mos reforsa tan katak, ita Viqueque presija desenvolvementu, tamba ne’e maka ita tenki tau buat hotu tuir nia fatin. Tamba ne’e mos maka ita komesa iha fulan kotuk ba ekipa sira nebe maka sei hala’o sira nia servisu tuir ida idak nia area ka tarefa nebe maka fahe tiha ona. Nune’e mos komandante PNTL Municipiu Antonio do Rego mos husu ba ema hotu atu kopera ho ekipa nebe estabelese tiha ona, no nia mos husu ba PNTL sira hotu atu se hakarak hakiak animal karik ba buka fatin nebe maka luan no dok hosi sidade, nune’e mos ba funsionariu sira no komunidade em geral.
“ Ita Viqueque ne’e presija maka desenvolvementu, se ita presija desenvolvementu entaun ita tenki iha ordenamentu atu nune’e bele ordena ho diak, tamba ne’e maka ekipa sira nebe estabelese tiha ona ne’e tenki kordena halo didiak ho komunidade sira atu bele halo tuir, liu liu ba PNTL sira,funsionariu sira atu tenki kopera uluk ho ekipa sira nebe estabelese tiha ona, atu nune’e ita nia komunidade sira mos bele banati tuir. Liu liu kona ba animal sira tenki tau iha luhan ka buka fatin nebe luan no seguru maka tau animal sira no laos husik fali iha cidade Municipiu laran. No mos ekipa sira nebe maka estabelese tiha ona husu atu servisu ho responsabilidade no tuir dekretu lei sira nebe iha ona “.
Antonio Rego mos apela ba ekipa desemina informasaun atu kontinua fahe informasaun ba komunidade sira atu nune’e bele hatene hodi tau sira nia animal iha fatin.
Entretantu tuir observasaun jornalista nian durante ne’e animal sira hanesan karau, bibi no asu sira kontinua namkari iha cidade capital Municipiu laran maske iha tempu liu ba kotuk Governu anterior sira hala’o ona kontrolu animal hodi oho maibe liu tiha komunidade sira kontinua husik fali deit animal sira namkari iha cidade laran. Tamba ne’e maka karik diak liu ne’e la’os avizu deit hodi mikrofon maibe presija sosializasaun ida nebe kontinua no kle’an ba komunidade sira nebe maka hela iha cidade capital Municipiu laran.
Jornalista ; Adriano A. Mesquita
