Loron 23 fulan Maiu sai hanesan loron Nasional hodi komemora Restaurasaun Independensia nebe Timor Leste proklama unilateralmente iha loron 28 fulan Novembru tinan 1975 liu ba. Ba tinan ida ne’e 2025 Timor Leste komemora restaurasaun Independensia ba dala 23 ho nia Tema maka, “ Hametin Paz no Dezenvolvementu “. Iha Municipiu Viqueque komemorasaun ne’e hala’o iha kampu demokrasia no sai hanesan Inspektur ba exar bandeira maka Prezidente Autoridade Municipiu (PAM) Viqueque, Francisco Cruz Ximoẽs Gonzaga Sores. Hafoin hasa’e tiha Bandeira RDTL nian Inspektor da exar le deskursu hosi Prezidente da Republika nian no kontinua kedas ho aprezentasaun parade. Iha intrevista jornalista sira husu ba PAM Viqueque kona ba tema nebe iha nia konfirma katak ita tenki prepara an ba halo dezenvolvementu no tenki zero ba iha konflitu no anarkismu hodi asegura dame no paz.
“ Ligadu ba Tema ne’e hau hakarak fo hanoin fila fali ba inan aman sira katak, tinan ida ne’e ita tenki prepara ita nia an ba dezenvolvementu, liu liu halai ba desentralizasaun ba poder local, tamba ne’e se hakarak dehan Viqueque atu ba oin, mai ita servisu hamutuk kolabora hamutuk atu lori dezenvolvementu ne’e ba oin. Maibe ita tenki servisu hamutuk hodi dehan zero ba anarkismu, zero ba perturbasaun, zero ba anarkismu no zero ba impedementu sira, ita buka de tal maneira hodi asegura katak Viqueque iha dame, hakmatek, paz no unidade “.
Pam ne’e mos kontinua dehan ita tenki tau prioridade ba iha area agricultura nian tamba hori uluk kedas ema sempre dehan Viqueque maka sai hanesan kabun ba TL.
“ Ita tau importansia ba area agricultura tamba hori uluk kedas ita nia saudozu Nicilao Lobatu dehan ona katak se Timor aban bainruan ukun rasik an ona Viqueque maka sai kabun ba Teritoriu Timor Leste laran tomak, tamba ne’e ita agora ukun an ona tamba ne’e tenki hasa’e ita nia potensialidade nebe iha hodi hatan ba nesesidade ekonomia povo nian “.
PAM Francisco Simoẽs Gonzaga mos kontinua hatutan tan dehan, ba tinan 2025 ne’e ne’e sei tau liu prioridade ba infraestruktura hanesan Estrada hosi Asalaitula mai to’o iha Ossu no mos Estrada iha capital Municipiu rasik.
“ Ba tinan ida ne’e 2025 ita sei tau prioridade ba iha area Estrada nian hosi Asulaitula mai to’o iha capital Municipiu nian, no ita mos rona hotu ona katak Estrada hosi Lospalos liga mai iha Watucarbau mai Uatulari ba Lacluta mos tama hotu ona iha planu ba tinan 2026. Ita mos hatene katak Municipiu bele ezekuta deit osan ho montante hosi rihun atus lima ( $ 500.000) mai kraik, tamba ne’e maka Estrada ne’e it abele dehan katak kompetensia Nasional nian “.
Hatan ba pergunta jornalista nian kona ba iha preokupasaun balun nebe dehan dezenvolvementu iha Municipiu Viqueque ladun la’o PAM ne’e dehan dezenvolvementu ne’e la’o fazeadamente
“ Ita dehan nune’e, dezenvolvementu ne’e la’o fazeadamente, ita hahu hosi Estrada hodi bele halo konektividade ema hosi fatin id aba fatin seluk nune’e mos iha area agricultura nian mos ita komesa hadiak ona, tamba ne’e maka Estrada ne’e sai factor prioridade atu nune’e ita nia area agricultura kuandu diak on abele hatan on aba nesesidade Nasional it abele transporta ona ho diak tamba Estrada diak ona “.
Kona ba preparasaun ba desentralizasaun poder local Francisco Cruz afirma katak iha ona preparasaun lubuk ida maka agora dadauk la’o hela fazeadamente no sei alarga tan cidade Viqueque halo luan liu tan
“ Liga ba preparasaun poder local nian ita iha ona planu lubuk ida nebe maka ita hakat fazeadamente, nune’e iha tinan ida ne’e ita sei hari edifisiu Kamara Municipiu nebe sei hatur iha area Maluru no mos Uma Ua’in Kraik nian tamba ho hanoin ida katak Viqueque tenki hakat ba oin, tamba ne’e maka ita hahu halo alargamentu cidade ba to’o iha neba, tamba ita labele sulan deit malu iha fatin klot ida ne’e “.
Entretantu wainhira jornalista husu kona ba balkaun uniku nebe to’o agora seidauk hari PAM ne’e klarifika katak sei estabelese iha tinan 2025 ne’e tamba iha ona fatin no mos orsamentu
“ Balkaun Uniku ita sei estabelese iha tinan ida ne’e (2025) tamba buat hotu ita la’o ho planu hosi Nasional, maibe oras ne’e dadaun ita iha ona fatin maka uma eis sekretaria konsellu nian nebe konyesidu liu naran GIZ no mos orsamentu iha ona ho montante hamutuk dolars amerika rihun hitu nulu resin lima ($ 75.000), no ho balkaun uniku ne’e bele fasilita ona ita nia inan aman sira nia nesesidade nebe presiza no lalika ba to’o tan iha Dili ka Baucau neba “.
Entretantu seremonia hasa’e bandeira hodi komemora loron restaurasaun independensia ba dala 23 tinan 2025 ne’e sai hanesan eskipa ba dada bandeira mai hosi escolar sekundariu Jeral Kalixa no PNTL, ekipa Dram Band mai hosi Escola sekundariu Jeral Katolika Santu Estevao no hetan partisipasaun maximu hosi Directores linas Ministeriais sira, Directores linas sektorais sira, lider relijiozu sira, Veteranus, Komandante PNTL Municipiu, Administrador Postu administrative Viqueque vila, juventude, estudantes no profesores sira, lideransa sukus, organizasaun feto, emprezarius, sosiadade sivil no komunidade sira nebe maka hela iha area cidade Viqueque nian.
Jornalista; Adriano A. Mesquita
