Komesa hosi fulan Janeiro mai to’o loron 12 fulan Marsu tinan 2025 ne’e Be Timor Leste (BTL-EP) hatama ona osan hamutuk rihun lima atus tolu sanulu resin hat dollars Americano (US$ 5.314,00) ba kofre Estadu. Marito da Costa, Diretor BTL-EP Municipio Viqueque hato’o lia ne’e ba jornalista Radio Povo Viqueque (RPV) iha nia knar fatin Beloi Viqueque foin lalais ne’e.
“ Reseitas nebe ita hetan hosi Janeiro mai to’o Marsu dia 12 iha hamutuk 5.314 dollars nebe maka ita depozitu ona iha Banku . Osan hirak ne’e ita hetan hosi kontadores sira nebe ita instala ona iha Viqueque laran ne’e hamutuk 659 nebe instala ona hahu kedas hosi zona Beloi, tama ona iha Boramatan, Kabira Oan, Lamak Laran ne’e ita kobre ona sei falta deit zona Olobai maka oras ne’e ita order hela nia metro kontador no iha tempu besik sei instala ba iha neba (Olobai) “.
Wainhira jornalista husu kona ba oinsa atu halo melloramentu ba sistema Be Mos iha capital Municipio laran Marito da Costa dehan sira hasoru hela defikuldades balun.
“ Em primeiru ami hasoru hela dezafiu bot ida maka destribuisaun be ba iha zona sira nebe dok hosi ita nia rezervatoriu sentral ne’e labele halo kalkulasaun ba iha oras barak nia laran tamba kanu distrubuisan sira nebe maka iha tuan liu ona no balun mos kuak ona iha rai okos, tamba ne’e iha tinan hirak liu ba ita hatama ona iha planu mestre, ita prepara DED dezenyu BOQ ita prepara hotu no ita tama tiha ona iha prosesu aprovizionamentu maibe tamba iha kestaun balun entaun ita nia Governu pending tiha obra ne’e atu hodi halo fali reviw ninia dezenyu BOQ sira no nia orsamentu ne’e rasik mos kansela tamba imprestimu entaun ita hein katak ba future bele hatama fali ba iha orsamentu ita nian rasik foin maka ita bele halo melloramentu no resolve be iha capital Viqueque “.
Entretantu durante ne’e destribuisaun Be Mos iha cidade capital Municipiu Viqueque nian loron ida be sai no loron 2 be la sai, ne’e ba konsumedor sira nebe maka seidauk instala metro kontador maibe ba konsumidor sira nebe maka instala ona metro kontador be sai kada loron mais ou menus oras 5 -6 deit.
Jornalista : Adriano A. Mesquita
