Komesa hosi fulan Janeiro mai to’o fulan Junho 2024 ne’e,Be Timor Leste Empreza Publiku (BTL-EP) Municipiu Viqueque rekolla ona reseitas ba estadu hamutuk osan rihun sanulu resin rua atus sia hitu nulu dollars Amerika ( $ 12970,00). Marito da Costa kordenador BTL Municipiu Viqueque iha nia knar fatin Beloi Viqueque haktuir katak, hosi uma kain atus lima (500) nebe maka instala ona metro kontador sira selu tuir dekretu lei nomeru 4/2004 hanesan ba klase ekonomia sei selu sentavus rua nulu kada metro kubiku no ba industriais sira selu sentavus nen nulu kada metro kubiku.
“ Portantu regras nebe ita aplika tuir Lei Nomeru 4/ 2004 nebe iha hanesan, ba ita nia konsumidor sira nebe bain bain ka dehan klase ekonomia sira selu kada metro kubiku sentavus rua nulu ( $ 0,20 ) no ba sira nebe halo bisnis ka industria (komersial) selu sentavus nen nulu ( $ 0,60 ) kada metro kubiku. No reseitas nebe ita rekolla hosi uma kain sira anterior mai to’o ohin loron hetan uma kain atus lima (500) ona reseitas nebe ita rekolla hahu hosi Janeiru mai to’’o iha fulan Junhu, ita tama ona trimester terseiru hahu hosi trimester primeiru, trimester segundu no ita rekolla ona reseitas hamutuk doze mil novicentos setenta dolar Amerikanu ( $ 12.970 ) maka ita hatama on aba kofre Estadu. Kontador nebe ita instala hahu hosi 2002 mai to’o ohin loron ( 2024 ) ita monta to’o iha horsehik hamutuk uma kain 500 ona maka ita instala ona ho kontador 500 “.
Entretantu Marito da Costa mos husu ba konsumidor sira atu poupa be tamba agora dadauk ita tama ona ba tempu bailoron.
“ Nune’e mos liga ho ita nia naturza, liga ho mudansa klimatika hosi fatin ida ne’e, hanesan Empreza nebe maka responsabiliza ba Be capital Municipiu husu atu iha konsiensia hodi hare saida maka sei akontese, ita nia debit be sei tun maka’as tamba ne’e, husu hotu hotu nia apoiu, hotu hotu nia konsiensia kuidadu be, hanoin ita nia maluk sira seluk atu asesu be hanesan, evita atu uza makina sira evita atu halo ligasaun illegal sira, be nebe maka ita nia tekniku sira destribui ba ne tuir forsa, tuir preasaun nebe maka mai hosi be matan katak ida ne’e maka situasaun riil nebe maka ita hasoru iha ita nia Municipiu ligadu ho mudansa klimatika ka bain loro nebe maka sei mai. Tamba ne’e teknikamente husu ita bot sira nia konsiensia atu nune’e distribuisaun be’e ne’e hotu hotu hetan hanesan barak tuir debit be, uituan tuir menus be nebe maka akontese. Ita sei fahe halo hanesan , atu nune’e distribuisaun be ne’e ita hotu hotu bele hetan hanesan liga ho mudansa klimatika, atu nune’e ita hotu hotu asesu be hanesan “.
Entretantu Tuir tarjetu nebe maka BTL-EP Municipiu Viqueque identifika ona hodi atu monta metro kontador hamutuk uma kain besik rihun rua (2000) maibe to’o agora sira foin maka halo instalasaun ba uma kain atus lima (500) deit.
Jornalista ; Rogerio Soares
