Veteranus Fernando da Costa Soares ho naran kodigu SINXE observa prosesu dezenvolvementu iha Municipiu Viqueque sei la’o hakdasak hela, maske Timor Leste Restaura ona nia Independensia ba dala rua nulu resin rua (22). Tuir Sinxe katak maske ita restaura ona Independensia tinan 22 maibe dezenvolvementu infraestruktura iha Municipiu Viqueque sei hakdasak hela, liu liu liga ho Estrada nebe liga ba Postu Administrativu sira no iha capital Municipiu laran.
“ Nudar Veteranu ida iha Municipiu Viqueque observa katak maske ita komemora ona ita nia Independensia ba dala 49 no restaura ona Independensia ba dala 22, maibe prosesu Dezenvolvementu iha Municipiu Viqueque rasik sei hakdasak hela. Tamba ne’e nudar Veteranu hakarak rekomenda ba Governu atu aselera Dezenvolvementu iha Municipiu Viqueque, liu liu infraestruktura Estrada nebe liga ba Postu Administrativu sira, nune’e mos Estrada iha capital Municipiu laran. Tamba ita hare fali ba ita nia komunidade sira enfrenta problema nebe sei barak, liu liu liga ho Estrada nebe defikuta tebes ita nia komunidade sira atu bele lori sira nia produtu local sai ba iha merkadoria. Se lae ita nia povu sira dehan katak sira seidauk sente lolos Ukun An ida ne’e “.
Hatan ba pergunta jornalista nian relasiona ho komemorasaun Proklamasaun Unilateral Independensia ba dala 49 iha Municipiu Viqueque Veteranu SINXE dehan, “ hau kontetnte tamba pela primeira vez maka FFDTL mai hola parte hodi komemora loron 28 Novembru ba dala 49 iha ita nia Municipiu hodi like mos feira hodi haksolok ita nia komunidade sira. Tamba ne’e husu atu eventu hanesan ne’e tenki kontinua iha future mai “.
Veteranu Fernando da Costa Soares SINXE mos observa katak “ liga ho area seluk hanesan Edukasaun no Saude iha ona avansu maibe presija tau nafatin atensaun tamba area Edukasaun nian iha escolar balun nebe sei falta profesores no mobiliariu escolar nian mak hanesan meja kadeira. Kona fali ba iha Saude nian iha Klinika balun nebe iha areas remota sira sei falta aimoruk no dala ruma parteira ka Doutor sira la ba iha neba, ne’e defikuta tebes ita nia pasiente sira nebe presija ajuda emerjensia “. No SINXE kontinua husu ba Governu atu tau atensaun maximu ba iha Instituisaun sira relevante ne’e hodi bele fo atendementu nebe diak ba ita nia povu sira, liu liu iha areas sira nebe izoladu.
Entretantu Veteranu SINXE hato’o lia hirak ne’e ba jornalista Radio Povo Viqueque (RPV) iha kampu Demokrasia Viqueque wainhira partisipa iha komemorasaun loron Proklamasaun da Independensia Unilateral ba dala 49, 28 -11-2024 ne’e.
Atu informa mos katak iha komemorasaun ne’e sai hanesan Inspektor ba seremonia maka Ministru Agricultura Pekuaria Pescas e Floresta (MAPPF) Marcos da Cruz hodi le’e Deskursu Prezidente da Republika (PR) nian no aprtisipa hosi Prezidente Autoridade Municipal (PAM) Sekretarius Municipal, ho Direktores linyas Ministeriais no Sektorais, Koamdante PNTL ho nia membrus, FFDTL, Veteranus estudantes no mos komunidade balun no escolar Liceu 4 de Stembro Viqueque hamutuk ho PNTL maka responsabiliza ba dada Bandeira RDTL. Hafoin remata tiha seremonia hasa’e Bandeira iha kampu Demokrasia, Ministru APPF Marcos da Cruz kontinua kedas ba entrega ekipamentus hanesan hand traktor 30, traktor mediu roda 4 unidade 2, Hand sprayer 30, makina sama hare 5, makina behu batar 5, ai oan tanjerina 1.200 no lakeru ho batar toneladas 6 ba PAM no asina termu de entrega hodi kontinua fahe agricultores sira iha salaun Municipiu Viqueque iha Beloi nebe asiste hosi Sekretarius Municipal na’in 3, Komandante PNTL, FFDTL, Vetenus no Directore linhas Ministeriais no Sektorais sira. No sasan sira ne’e hetan kedas bensaun hosi Padre Parku Imaculada da Conceiḉaồ Viqueque Pe. Tomas de Aquino.
Jornalista; Adriano Antonio Mesquita
