Vendedores iha merkadu Viqueque tuan sei muda hotu ba iha merkadu Olobai nebe Estadu sei hari iha tempu badak. Prezidente Autoridade Municipal ( PAM ) Viqueque Francisco Cruz Simồes Gonzaga Soares hato’o lia ne’e wainhira akompanya ekipa hosi Sekretaria Estadu Asuntu Toponomia Organizasaun Urbana ( SEATOU ) hala’o vizita ba merkadu Viqueque tuan foin lalais ne’e.
“ Ami iha tempu badak sei haruka ekipa ida atu tun ba terenu hodi identifika ita nia vendedores sira nebe maka lokalizadu iha fatin nebe maka ohin ita vizita ona ba ( merkadu tuan ) para depois sira maka aban bainrua ita sei muda ba iha merkadu Olobai nebe Estadu sei konstroi iha tempu badak. Nebe hau espera katak sira nebe maka ohin ita vizita ona ita hare katak sira mos iha informasaun ona ita nia prezensa iha neba hatudu katak prezensa Estadu mai dadauk ona, se hakarak atu kopera ita kopera se mak lakohi kopera entaun ne’e problema ho Estadu”.
Entretantu PAM Francisco Cruz mos konfirma tan dehan, provizoriamente sira sei bele fa’an lai ba hodi hein karta Notifikasaun hosi Diresaun Terras no Propriadades no mos hosi merkadoria mos sei aprezenta buat balun ba sira tamba tuir PAM katak dadauk ne’e sasan nebe vendedores sira fa’an liu liu hanesan modo tahan sira okupa hotu trotoar leten no la fo hijiene nebe diak ba konsumidor sira nia saude.
“ hau hanoin provizoririu ne’e sira bele fa’an lai hodi hein notifikasaun hosi parte Terras no Propritarius sei mai informa ba sira kona ba rai, nune’e mos hosi parte merkadoria sei mai esplika buat balun ba sira oinsa atu fa’an ho diak, tamba ohin ita mai ne’e hare katak barak mak fa’an iha trotoar leten liu liu modo sira, ne’e ita hare katak la saudavel liu liu ba konsumidor sira nia saude”.
Iha fatin hanesan Directora Jeral ( DJ ) SEATOU Odete Maria Florindo nebe hetan konvite hosi PAM hodi tun direta mai vizita fatin publiku sira iha Municipiu Viqueque dehan fatin sira ne’e mesak tama hotu ba iha espasu publiku, liu liu iha area merkadu nian, sa tan merkadu antigu ema labele hela iha nebe tamba fatin ne’e autoridade local sei hadia hodi sai fatin nebe estratejiku iha future. DG ne’e mos konfirma katak nia mai atu hare uluk hodi bele ba informa kedas ba SEATOU atu nune’e karik hetan konvite hosi PAM atu mai karik, Nia hatene ona fatin nebe nebe maka atu bele halo intervensaun imediata.
“ Heta konvite hosi PAM para atu tun mai iha terenu hodi hare kedas espasu publiku nebe maka sira uja hela no ne’e sai hanesan bukae ida mai ami para fila ba hodi aprezenta b aba Sua Exelensia Sekretariu Estadu para tuir fali mai karik hetan fali konvite para Sua exelensia atu tun fali mai entaun ami hatene ona fatin nebe nebe maka presija halo atuasaun eimediata kedas hanesan ne’e ho jestaun merkadu sira. Fatin tun mai ne’e kuaje tomak hotu ne’e espasu publiku, sa tan ohin ita tun mai ne’e mos trotoar leten sira ema fa’an hotu sasan ba. Depois tama tan fali iha merkadu laran neba, merkadu ne’e antigun labele ba hela tan fali iha neba, toba tan fali tenki husik fatin ne atu ema labele hela ba tamba ne’e merkadu. Oinsa Prezidente Autoridade atu halo jestaun para hadiak ka organiza fila fali fatin ne sai fali fatin ida nebe la hanesan ho agora dadauk ita hare”.
Directora Jeral SEATOU Odete Maria Florindo mos afirma katak nudar sidadaun diak ema hotu tenki hakru’uk ba Lei, ita iha lei nia okos hotu tan ne’e kuandu Lei haten atu esvazia fatin ne’e tenki esvazia duni fatin nee tamba ne’e espasu publiku labele utiliza ba fa’an sasan iha neba, I labele utilija tan fali baleta sira no trotoar letan hodi halo uma no fa’an sasan iha neba, fatin ne para ema la’o.
Rekorda fali katak Municipiu Viqueque rasik seidauk iha merkadu propriu ida atu hodi fasilita vendedores sira fa’an sira nia sasan tan ne’e desde TL Ukun Rasik An to’o agora vendedores sira utilija hela espasu Publiku hanesan merkadu antigun no ex Serrasaun hodi hala’o actividade negosiu no sai mos hanesan vendedores sira nia hela fatin, maibe Espau Serrasaun nian ne’e Governu tau tiha ona kuadru avizu ( papan nama ) katak fatin refere atu konstrui ka atu sai hanesan fatin ba Desportu nian iha future. Antes ne’e mos hari tiha ona merkadu ida iha parte Olobai nian maibe la utiliza no fatin refere mos komunidade sira nebe hela besik iha neba maka uza tiha hodi hela ba.
Jornalista; Adriano A. Mesquita
