Escola Secundaria Geral Kalixa Viqueque hili Ilas Saun Jose ba sira nia mahein. Director da Escola Kalixa Rozito Soares do Rosario hateten sira hili Saun Jose ba sira nia protector ka Mahein tamba hahu kedas hosi escola nee hari too ohin loron kuandu hahu anu leitivu foun no komemora aniversario escola nian sira sempre konvida padre mai halo misa, no hosi amu sira fo hanoin ba sira katak tenki hili Santu ida hodi sai hanesan protector ba escola refere. Director escola nee hatutan liu tan dehan haforsa liu tan sira atu hili Ilas Saun Jose nian ba sira nia mahein wainhira Ilas nee sai hosi Dioseze Baucau hodi Vizita Parokia sira iha Mahon Dioseze Baucau nian mai too Parkia Viqueque, no parte Parokia kria Sertame entre Escola Sekundaria Nivel Parokia Viqueque nia laran no Escola Sekundaria Geral Kalixa maka sai hanesan Primeiru lugar hodi Representa Parokia Viqueque hodi ba tuir Fali sertame anivel Dioseze iha Baucau. Tamba nee maka profesores, estudantes hamutuk ho inan aman sira deside hili Ilas Saun Jose ba sira nia Mahein no hetan inaugurasaun Hosi Padre Parku Viqueque Pe. Evaristo iha loron 14 -02-2023.
Iha seremonia Inaugurasaun nee mos Director Escola hatoo agradesementu ba Profesores sira, estudantes no mos inan aman sira tamba ho sira nia kontribuisaun maka bele hari ona Ilas Saun Jose nian iha sira nia escola no hetan bensaun hosi amu paroku hodi sai hanesan mahein ba escola refere.
Iha seremonia Inaugurasaun Ilas Saun Jose nebe sai mahein ba escola Sekundaria Geral Kalixa, Padre Parku Viqueque Pe Evaristo nebe Inaugura Estatua nee dehan, Domin iha Lia fuan no hahalok, lia fuan deit la too maibe Domin tenki hatudu mos ho hahalok. Padre Evaristo dehan tan katak hahalok sira nebe maka ita presisa halo tuir hosi Saun Jose hanesan aman diak., aman ida nebe la koalia barak, aman ida nebe hatene halibur nia oan sira, hatene halibur nia familia atu bele lori nia familia ne ba besik liu skramentu sira. Pe Evaristo hatutan dehan Saun Jose hanorin ita atu hadomi maromak nia ukun fuan, atu hadomi maromak nia dutrina no hadomi orientasaun sira nebe maka maromak husik hela liu hosi sakramentu sira. Tamba nee padre Parku nee husu ba familia escola Sekundaria Geral Kalixa atu banati tuir Saun Jose nia hahalok sira nee atu nunee bele haklaken diak liu tan ba ema hotu hodi bele atinji ita hotu nia mehi ida katak sai Bom Sidadun hodi desenviolve future nebe diak.
Entretantu tuir informasaun nebe maka RPV hetan hosi komisaun Organizadora planu katak orsamentu ba hari Estatua SAun Jose nian iha escolar nee hamutuk Dolars Amerika ruhun Rua resin ( $ 2.000 resin ) nebe mai hosi kontribuisaun Profesores sira, estudantes o inan aman sira balun, no desenho ba estatua nee rasik mai hosi Padre Vigario Parokia Viqueque nia Pe, Tiago Sarmento. No Estatua Saun Jose nian nebe sai ona mahein ba Escola Kalixa nee hetan Inaugurasaun hosi Padre Parku Viqueque Pe Evaristo iha oron 14 fulan Fevreiro 2023 nee tamba loron refere hanesan loron Santo Valentinu nian.
Jornalista; Manuel Baptista
