Wednesday, April 17, 2024
spot_img
HomeFoto GaleriaKomemorasaun Loron Mundial ba Redusaun Risku dezastre iha Municipiu Viqueque

Komemorasaun Loron Mundial ba Redusaun Risku dezastre iha Municipiu Viqueque

Loron 13 fulan Outubro sai hanesan loron Internasional ba Redusaun Risku Dezastre iha Mundu tomak, Tamba nee iha Municipiu Viqueque halao komemorasaun nee iha Suco Fatudere Postu Administrativu Viqueque vila ohin 20-10-2022. Ba jornalista Radio Povo Viqueque, Comandante Operasional Autoridade Protesaun Civil ( APC ) Municipiu Viqueque, Inspektur Pol. Matias da Silva dehan, objetivu hosi komemorasaun nee atu fo hanoin hikas ba komunidade sira nebe hela iha fatin risku no kada tinan sempre afetadu ba dezastre Naturais iha Municipiu Viqueque nia laran. Komandante Operasional APC Municipiu nee mos hatutan dehan, ba tinan ida nee ( 2022 ) ita hili fatin hodi komemora loron Mundial Redusaun Risku Dezastre iha Suco Fatudere tamba Suco nee mos tinan tinan sempre afetadu hosi Dezastre Naturais o iha fulan Junho tinan ida nee Suco Fatudere komunidade barak liu maka afetadu ba Dezastre hanesan bee sae sira nia uma, estraga toos,no mos plantasaun sira no anin sobu uma.

“ Loron Mundial Risku dezastre nee lolos monu iha loron 13 fulan Outubro, maibe ita iha Municipiu Viqueque komemorasaun nee ita foin halao iha ohin loron 20-10-2022 nee atu hodi fo hanoin nafatin ba ita nia komunidade sira atu oinsa karik akontese dezastre sira mos bele hatene ona oinsa atu evakua ka salva an, no mos ita hili Sucu Fatudere nee tamba Sucu ida nee mos kada tinan sempre akontese hela deit Dezastre. No iha tinan ida nee nia laran iha fulan Junhu liu ba ita iha Municipiu Viqueque nee Sucu Fatudere maka afeta barak liu ba dezastre hanesan Bee sobu sira nia uma, estraga toos animal no plantasaun sira”.  

Entretantu Matias da Silva mos husu ba ema hotu atu kuidadu ambiente hodi labele estraga ka tesi ai arbiru, buka atu hamos bee dalan sira no foer ka lixu labele soe iha bee dalan tamba buat hirak nee maka sei afeta hodi hamosu dezastre Naturais wainhira udan.

Iha fatin hanesan Cefe do Suco Fatudere, Paulo Soares Felipe hatoo obrigado no agradese ba komisaun Organizadora ba komemorasaun loron Mundial Risku Dezastre Municipiu nian tamba bele hili ona nia Sucu hodi komemora loron importante ida nee,

“ Iha nee ami atu agradese deit ba utoridades Municipiu nian tamba bele hili ona ami nia Suco hodi komemora loron ida nee. No ami mos agradese tamba bele mai ona hosi parte oin oin no parseiru Internasional sira tamba bele mai hodi fahe mos informasaun ba ami nia komunidade sira hodi hatene, tamba buat ida dezastre nee iha nia at no mos iha nia diak. Nia at maka karik akontese ita lakon ita nia sasan, animal plantasaun no mos ema nia vida, maibe iha mos nia diak maka ita bele hetan apoiu ka ajuda hosi partes kompetente sira hanesan Agensia ka ONG Internasional sira, Governu no mos ita nia ONG local sira. Atu dehan mos katak ami iha nee kompostu hosi Sucu tolu maka hola parte iha actividade ida nee mak hanesan Suco Fatudere rasik, Suco Maluru no mos Sucu Uma Uain Leten. Dalai da tan ami agradese ba autoridade Municipiu no parseiru sira tamba ho fuan boot bele hili ona ami nia suco hodi sai hanesan uma naiin ba komemorasaun Loron Mundial Risku Dezastre ba ttinan 2022 nee”.

Entretantu iha komemorasaun nee halao mos Adegan ka simulasaun hosi parte Ekipa Bombeirus o CVTL kona ba oinsa salva vitima sira wainhira akontese dezastre no iha vitima no oinsa atu halo primeiru sokoru ka pertolongan pertama.

Partisipa iha seremonia komemorasaun nee maka, Komandante Operasaun APC Municipiu ho nia ekipa, dministrador Posto Viqueque Vila, Komandante kuadra Polisia Postu Viqueque, Directores Linhas servisu Ministeriais, cefe do Suco nain tolu, komunidade Suco Fatre, Parseiru ONG Lokal no Internasional hanesan ADRA, CRS, CARE Internasional, CVTL KHC (Knua Haberan Comunidade) no mos konvidadus sira seluk. Informa mos ba ita boot sira katak Actividade komemorasaun Loron Mundial ba redusaun Risku Dezastre a nivel Nasional iha tinan kotuk (  2021) halao iha Municipiu Viqueque no hola fatin iha Suco  Bahalara Wain, no ba tinan ida nee ( 2022) a nivel Nasional halao iha Municipiu Covalima Suai .

Actividade nee halao tamba hetan mos apoiu maximu hosi Governu Lokal, ONG Internasional sira hanesan CARE, ADRA, CRS, no CVTL filial Viqueque no ONG Lokal KHC ( Knua Haberan Comunidade).

 

Jornalista; Manuel Baptista

Editor     ; Florindo de Jesu

 

 

RELATED ARTICLES
Continue to the category
0 0 votes
Article Rating
Subscribe
Notify of
guest
0 Comments
Inline Feedbacks
View all comments
Fans na'in: mak rona hela.
Loading ...

Trending Semanal.

0
Would love your thoughts, please comment.x
()
x